تالشیمه
تالشیمه تالش از خاله باهاره چم دیل
ملگزاره تیجره گییریه شییاره چم دیل
پپو باله ، کوکو سازه ، کفترون قشنگه کوج
وله جاره ، وله جاره ، وله جاره چم دیل
خندیله پشتی کنه سرپوشه خاکه و اوری جان
ایسپی دشته ، خانه بنده، میری لاره چم دیل
مولومی خردنه ، آوینه برایه ، چمی سو
الاله دشتی مینی کئوئه رواره چم دیل
کئوئه آسمونه لکه ی خر نی دییار چه ی سینه کو
فته آوتاوی چرا نه ، ملگزاره چم دیل
زنگه لوله و خسار و شوی نه ش نسبتی نی
اناری تیته و ساره نه عیاره چم دیل
شیطونی سس نپرا دس نپرا چه ی دییارون
کشکشانه، بابا تیر کمونی یاره چم دیل
گولاگول و تمسی نسله و غولون چمه تی
شوی خاله زونی چه ؟! بی کسه جاره چم دیل
تنخا گنجی یه ک پس منده مٌ کو چول به پسو
داتام و کادوسی داوره یادگاره چم دیل
دیلیم اوچیر به و کشته ، ناجه به دشمنی را
توره پترساونه سقه داره چم دیل
تالشیمه و چمٌ دیل دشمنی خاوون ویخسه
لدو میوه یه لدو ؛ مگه دداره چم دیل
کینی بو پترکٌ آتشفشانی شی سینه کوم
هزارون سالی جلف پبه زهاره چم دیل
زونوم از، آوتاو و آوی کو مرا روشونتره
دنیا ای روج بومونو ، ظلمتی داره چم دیل
زونوم از، آوتاو و آوی کو مرا روشونتره
دنیا ای روج بومونو ، ظلمتی داره چم دیل
تاسینه تالش
(دکتر فرزاد بختیاری مرکییه)